لست باتمان
هو عيب ان يبقى عندى احساس؟ غلط انى أتألم لما حد يجرحنى؟
ليه لما أكون فى موقع عطاء بيبقى (أحلى حاجة فيكى يا منال مشاعرك) و لما أكون فى موقع احتياج بيبقى (مشكلتك يا منال انك بتحكمى مشاعرك و بتبقى ضعيفة)
أسئلة ما بتنيمنيش – بس ما اعرفش أبقى غير كدا – الالم دا تمن أنا هادفعه بمنتهى الرضى لعلاقاتى – ساعات العلاقات دى هتبقى مشبعة و ساعات جارحة – بس العائد يستاهل
مش عايزة أبقى بات مان (أو وومان) – عايش فى الضلمة عشان يحمى ذاته مع انه ممكن يحمى جوثام سيتى عادى بشخصيته – مش محتاجة أحبس نفسى فى جوثام سيتى لان مافيش خطر على ذاتى أصلا – ذاتى دى ماحدش ينفع يدمرها غير الله سبحانه و تعالى لما ييجى معاد موتى – الدليل على كدا انى يا ما اتعورت و اتشلفطت و اتبهدلت بس منال لسه موجودة
الخطر الحقيقى انى أضحك على نفسى و أقول مش هاتعور أو انى أكتم الالم – فافضل أعانى – لا باخف و لا باموت
ألمى و ضعفى دا هو قوتى – لانى باحس بالناس و باعرف أتواصل معاهم – و لانى كدا هابقى واقعية – و هابقى معترفة بان لا ملجأ و لا منجا الا الى الله كما قال (يريد الله أن يخفف عنكم و خلق الانسان ضعيفا) – لو قلت مافيش ألم و لا حزن و لا ضعف يبقى فين الاحتياج لله سبحانه و تعالى؟
لست باتمان – أنا باتعور و باتجرح و باعيط و بافرح و باحب و ياساعد و باحتاج – أنا كدا و مش عايزة أتغير
منال علام